Асқақтай бер, айбынды Қазақстан!
Қазақстан!
Пай, пай, пай!
Ардағым-ай!
Сен менің Шолпанымсың, жанған ұдай,
Өзіңде өмір сүрген қандай бақыт,
Өлмейтін махаббатым, арманым-ай!
Дәл осылай жырлаған Мұқағали ақындай өз Отанымыз Қазақстанымызды сүйе алу баршамыздың парызымыз деп білемін. Отанды сүю дегеніміз жалаң ұранмен немесе құр сөзбен емес, адал іспен, шынайы патриоттық сезіммен, рухты мінезбен дәлелденуі шарт.
Өз елінде өмір сүргенді бақыт деп түсінген кез-келген адам, сол бақытының баянды болуы - елінің амандығымен, халқының бірлігімен, жерінің тұтастығымен тікелей байланысты екендігін түсінуі қажет. Және сол жолда аянбай еңбек етуі керек.
Бүгінгі байтақ жерді бізге ақ найзаның ұшымен, ақ білектің күшімен қорғап аманат еткен бабалардың ерлігіне бас ие отырып, еліміздің дамуына өз үлесімізді қосып, болашақ ұрпаққа тәуелсіз, өркендеген мемлекетті қалдыру міндетіміз.
Осы тұрғыда Боралдай кентінде руханият саласындағы жұмыстар жоспарлы түрде атқарылып келеді.
Биыл мерейтойлары аталып өтілетін қазақ халқының нар тұлғаларының автопортреттері мен сара жолын бүгінгі ұрпаққа насихаттау мақсатында бірқатар шаралар өткізілді.
Ұлы Отан соғысының ардагері, Кеңес Одағының батыры, Халық қаһарманы, тәуелсіз Қазақстанның тұңғыш Қорғаныс министрі, армия генералы Сағадат Нұрмағамбетовтің 100 жылдық мерейтойына орай Боралдай кенттік кітапханасында «Қазақ халқының қадірлі ұлы Сағадат Нұрмағанбетов» атты патриоттық шара өтті. Патриоттық шараға жастарға батырымыздың өмірбаяны, ұмытылмас батырлығы, қазақ халқына сіңірген еңбегі туралы кең көлемде ақпарат берілді.
Абай Құнанбайұлының туған күніне орай жастарға ақынның өмірін, адами қасиеттерін үлгі ете отырып Абай туындыларын сүйіп оқуға, білім-ғылымға құмарлығын арттыруға, көркем сөйлеуге, өз бетімен іздене білуге, шығармашылық жұмыс істеуге көмектесу мақсатында «Абай әлемі» атты әдеби кеш өткізілді. Әдеби кеште Боралдай кенті Аналар кеңесінің төрайымы, Іле ауданының құрметті азаматы Мархаба Қаламбаева кент жастарына ұлы Абайдың дара жолы туралы баяндап, әрбір жастың өз елінің кірпіші болып қалануы керектігін жеткізді. Аға буынның ғибратты әңгімесін ұйып тыңдаған жастар өз кезегінде Абайдың әндерін тамылжыта орындады.
Сонымен қатар, ағартушы, мәдениет және қоғам қайраткері, қазақ баспасөзінің алғашқы қарлығаштары атанып, ғылым кенін еңсерген қазақ филологиясының тұңғыш профессоры Құдайберген Жұбановтың өмірбаяны мен шығармашылығын таныстыру мақсатындағы «Ғылым көгінің жарық жұлдызы» атты тұлғатану сағаты, Жастар күніне орай жастар қоғамның үлкен қозғаушы күші, мемлекеттің дамуына серпін беретін қоғамның бір бөлігі әрі жастарға мемлекет тарапынан көрсетілетін қолдаудың ерекше екендігін жеткізу мақсатында «Жастар мәселесі — қоғам назарында» атты тэйблток, ақын Ақұштар Бақтыгерееваның 80 жасқа толуына орай ақын еңбектерін оқи отырып, елін сүюге, өлеңдерінің мағынасын түсініп бағалай білуге тәрбие беру мақсатында «Поэзия падишасы» атты поэтикалық марафон ұйымдастырылды.
5-қыркүйек ұлт ұстазы Ахмет Байтұрсынұлының туған күні әрі Тілдер мерекесіне орай жас ұрпақты мемлекеттік тілімізді сүюге, мәртебесін биік ұстауға тәрбиелеуге бағытталған «Тіл — татулықтың белгісі» атты дөңгелек үстел өткізілді. Шараға этно-мәдени орталықтың өкілдері мен кент жастары, ардагерлер қатысты. Дөңгелек үстелге қатысушылар «Тіл — ұлттың жаны, тілі жоғалған ұлттың – өзі де жоғалады» деген тақырыпта еркін сұхбаттасты.
«Бір ел — бір кітап» акциясы аясында қазақ прозасына өзгеше өрнек, ғажайып сыр-сипат әкелген көрнекті қазақ жазушысы, балалар әдебиетінің классигі, биыл 100 жылдығы ЮНЕСКО көлемінде аталып өтілетін Бердібек Соқпақбаевтың шығармаларын оқуға шақыру мақсатында Боралдай кенттік кітапханасында «Қаламгер қазынасы» атты вертуальды кітап көрмесі жасалды.
Осы тағылеттес мәдени-рухани, патриоттық шаралар кент әкімі аппараты қызметкерлерінің, кітапханашылардың, Аналар кеңесінің, Ақсақалдар кеңесінің және жастардың ұйымдастыруымен кентте орналасқан 6 орта мектеп пен 2 мемлекеттік балабақшада, кенттік кітапханада жүйелі түрде өткізіле бермек.
Жұлдыз Бұзауқызы,
Боралдай кенті әкімі аппаратының бас маманы
