АЗАТ ЕЛДІҢ ҰРПАҒЫ САМҒА БИІК

Тәуелсіздік келмеді қас-қағымда,

Сыйлай біл бостандықты жас шағыңда.

Азат елдің ұрпағы, самға биік,

Қалықта тәуелсіздік аспанында.

Аман болсын, жасасын арда қазақ,

Күні бар ататұғын алда ғажап.

Еліміз егеменді, еркін құстай,

Отыз үш жыл атты ғой таңдар азат!

Азат күн басымызда тұрар-дағы,

Ұлылар ұлтымыздан шығар тағы.

Айбарлы алты Алашым осы күні,

Орындалды Абылайдың ұлы арманы!

«Сөз Маржан» Collaboration Fest

ЕРКІНДІГІМ – ЕЛДІГІМ

Тәуелсіздік – тіршіліктің ғажабы,

Тәуелсіздік – бақытымның ғазалы.

Тәуелсіздік – халқымыздың мақтаны,

Тәуелсіздік – шаттығымның базары.

Желтоқсанда Алматының аспанын,

Рухты үнімен тебірентті жастарым…

Аппақ қарға жазып берді қанымен

Қазағыма Тәуелсіздік дастанын.

Ағаларым – Алашымның үнісің,

Әпкелерім – қырдың қызыл гүлісің.

Қазақ үшін жанын берген боздақтар

Отанымның нұрын шашқан күнісің.

ҚАЗАҚ ТІЛІ

Қазақ тілі – өшпес нұры қазақтың,

Қазақ тілі ән мен жыры қазақтың.

Қазақ атты ұлы халық тұрғанда

Әз тілімді етеді екен мазақ кім?

Мен – қазақпын, қазақ қаны бойымда,

Мен – Абаймын, қазақ жыры ойымда.

Былғамаймын өзге тілмен тілімді,

Даттау айтпа менің тілім жайында.

Тілім барда мен адаммын, халықпын,

Тілім барда Алатаудай алыппын.

Ана тілмен әлем халқын тамсантып,

Ана тілмен дүниені таныппын.

Ана тілім – наркескенім, айбарым,

Өзің барда жоламайды ойға мұң.

Менің бала жүрегіммен тілерім,

Ешқашанда сарқылмашы, қайнарым!

Диар Ануарбек,

№7 орта мектептің 10 «А» «Жас өрт сөндіруші» әскери-патриоттық сыныбының оқушысы