МЕШІТ ЖАМАҒАТТАРЫ АРАСЫНДА ВОЛЕЙБОЛДАН ЖАРЫС ӨТТІ

Ағымдағы жылдың 16 қарашасында Өтеген батыр ауылында мешіт жамағаттары арасында волейболдан аудандық жарыс өткізілді. Шара аудандық ішкі саясат бөлімі мен «Адам және қоғам» бірлестігінің қолдауымен ұйымдастырылды. Жарыстың негізгі мақсаты – жастар арасында салауатты өмір салтын насихаттау, спорттық белсенділікті арттыру және командалық рухты дамыту.

Жарысқа ауданның түрлі ауылдарынан келген 8 команда қатысты. Бас-аяғы 70 тен аса адам ойын алаңына жиналды. Әр команда өз құрамына 16 жастан жоғары спортшыларды енгізіп, дайындықтарының жоғары деңгейін көрсетті. Жастар арасындағы ынтымақтастық пен қолдаудың ерекше атмосферасы жарысты одан әрі қызықты ете түсті.

Шара қонағы ретінде Іле ауданының наиб иманы Аширбаев Алмат Абдімүталипұлы және Іле ауданының дене шынықтыру және спортты дамыту орталығының директоры Жұмаханов Даурен Ермекұлы шақырылды.

– Бүгінгі волейбол жарысына келген спортшыларға тартысты ойында сәттілік тілеймін. Мұндай жарыстар жастардың дене шынықтыруға деген қызығушылығын арттырып, оларды ұйымшылдыққа және белсенді өмір салтына шақырады. Алдағы уақытта мұндай шараларды жиі өткізіп тұру жоспарда бар. Спортпен шұғылданатын жастарымыздың қатары толыға берсін  – деді Даурен Ермекұлы.

Волейбол жарысы топтық кезеңнен басталып, жартылай финал және финал ойындарымен аяқталды. Әсіресе, «Өтеген батыр» және «Жаңаталап» командалары арасындағы ақтық кездесу көрермендердің назарын аударды. Қарсыластар жоғары шеберлік пен тамаша ойын тактикаларын көрсетті. Тартысты ойын нәтижесінде «Өтеген батыр» командасы жеңіске жетіп, бірінші орынды иеленді.  Екінші орынға «Жаңаталап», ал жүлделі үшінші орынға «Байсерке» ауылы жайғасты.

Жарыс соңында жеңімпаз командаларға арнайы кубок, медальдар және ақшалай сыйлықтар табыс етілді. Сонымен қатар,  «Үздік ойыншы» номинациясы бойынша «Байсерке» командасының ойыншысы  Мурсалимов Расул марапатталды. Ол ойын барысында шеберлігімен және көшбасшылық қасиеттерімен көзге түсті. Ал «Үздік қорғаушы» номинациясына «Өтеген батыр» командасының ойыншысы Мұшан Жеңіс ілікті.

Жастар арасындағы волейбол жарысы қатысушыларға ерекше әсер сыйлап, олардың достық пен командалық қарым-қатынасын нығайта түсті. Бұл шараның өткізілуі болашақта жастардың спортқа деген қызығушылығын арттырып, салауатты ұрпақ қалыптастыруға үлесін қосатыны сөзсіз.

Диана ҚАНАТ