НАШАҚОРЛЫҚҚА ҚАРСЫ КҮРЕС – ҚОҒАМДЫҚ ЖАУАПКЕРШІЛІКТІҢ ӨЛШЕМІ
Нашақорлық – кез келген қоғамды іштен ірітетін ең ауыр әлеуметтік дерттердің бірі. Ол тек бір адамның тағдырын емес, бүтін отбасының, тұтас бір қауымның өміріне кері әсер етеді. Бүгінгі таңда бұл мәселе әлемдік деңгейдегі қауіп-қатердің қатарында тұр. Сондықтан нашақорлыққа қарсы күрес – мемлекет пен қоғамның ортақ міндеті, баршамыздың азаматтық жауапкершілігіміз.
Есірткінің зияны тек денсаулықпен шектелмейді. Ол адамның ой-санасын улайды, ерік-жігерін әлсіретеді, өмірдің мәні мен маңызын жоғалтады. Есірткіге тәуелді жанның жан дүниесі күйреп, уақыты мен арманын, болашағын құртады. Бұл дертің түбі қылмыс, зорлық-зомбылық, отбасылық дағдарыс, әлеуметтік тұрақсыздық сияқты көптеген проблемаларға алып келетіні анық.
Соңғы жылдары мемлекет нашақорлықтың алдын алу, есірткі бизнесіне тосқауыл қою бағытында жүйелі шараларды жүзеге асырып келеді. Құқық қорғау органдары жасырын есірткі саудасына қарсы күресті күшейтіп, жаңа технологиялар арқылы синтетикалық заттардың таралу жолдарын анықтап жатыр. Білім беру ұйымдарында, қоғамдық орындарда, ақпараттық кеңістікте түсіндіру жұмыстары артып, жастарды дұрыс таңдау жасауға бағыттайтын жобалар іске асуда.
Алайда бұл міндет тек мемлекеттік құрылымдардың жұмысы емес. Әрбір ата-ана, әрбір азамат өз ортасында, өз отбасында профилактика жүргізуі керек. Балалардың бос уақытын дұрыс ұйымдастыру, олардың жан дүниесін түсіну, қолдау көрсету – нашақорлықтың алдын алудың ең тиімді жолдарының бірі. Жастарға үлгі көрсетіп, дұрыс орта қалыптастыру да ерекше маңызға ие.
Нашақорлықпен күрестің басты мақсаты – жазалау емес, адам өмірін сақтап қалу. Емделуге ниетті адамдарға қолдау көрсету, психологиялық көмек ұйымдастыру, қоғамға қайта бейімдеу – қазіргі қоғамның гуманистік ұстанымы болуы тиіс. Себебі әрбір адам екінші мүмкіндікке лайық.
Есірткінің пайдасы жоқ, алайда оның зардабы шексіз. Қоғам болып күрескенде ғана бұл қасіретке тосқауыл бола аламыз. Әрқайсымыз белсенділік танытып, ақпараттық сауатты арттырып, жастарға дұрыс бағыт-бағдар көрсете алсақ – болашағымызды қорғағанымыз.
Нашақорлыққа қарсы күрес – тек ұран емес, әр азаматтың борышы.
Бүгінгі әрекет – ертеңгі қауіпсіз қоғамның кепілі.
Даутқан Тоқжан Мейрамбекқызы
Алатау қаласының жастар ресурстық орталығының жетекшісі
