БІР АСПАН АСТЫНДАҒЫ ӨНЕР ТУЫНДЫЛАРЫ
17 сәуірде 2026 жылы Қазақстан Республикасы Ұлттық орталық музейінде, Britrise Ltd (Лондон) компаниясының қолдауымен «Бір аспан астында» атты халықаралық заманауи өнер көрмесі ашылды. Жоба әртүрлі елдер мен көркем бағыттағы суретшілерді біріктіретін маңызды мәдени оқиға ретінде ұсынылады.
Көрменің құрметті қонағы – Бахрейн өкілі Шейх Рашид Аль Халифа және оның RAK қоры. Оның жеке қатыса алмауына қарамастан, бұл жобаға қосқан үлесі көрменің жоғары халықаралық мәртебесін және мәдени дипломатиядағы маңызын айқындайды.
Экспозицияда Еуропа, Азия, араб елдері, АҚШ, Ресей, ТМД мемлекеттері және Қазақстаннан 70-тен астам суретші өз шығармашылығын ұсынған. Жұмыстар бейнелеу және сәндік-қолданбалы өнерді, фотографияны, сән үлгілерін, видео және аралас техникаларды қамтиды. Көптеген туындылар Қазақстанда алғаш рет көрсетілуде.
Көрменің негізгі идеясы – өнердің біріктіруші күш ретіндегі рөлін көрсету. Жоба әртүрлі мәдени көзқарастарды таныстыру, олардың үйлесімді өмір сүруі мен өзара байыту мүмкіндігін айқындату. Араб өнері Парсы шығанағы мен Таяу Шығыс елдерінің суретшілері арқылы ұсынылған, олар дәстүр мен заманауи үрдістерді ұштастыра отырып, болмыс, тарих және мәдени мұра тақырыптарын зерттейді. Жапон бағыты kawaii элементтері бар поп-сюрреализм эстетикасымен біріккен 12 суретшінің тобымен таныстырылады. Олардың жұмыстары ойын форманы терең психологиялық және эмоциялық мазмұнмен үйлестіреді. Еуропалық суретшілер академиялық дәстүрлерден алшақ, эксперименттік және инновациялық тәсілдерді көрсетеді.
Көрмеде қазақстандық суретшілер де маңызды орын алады: Гульнар Суинбаева, Серик Тайнов, Кабыл Халыков, Гульнара Табанова, Бибигуль Смакова, Тұмар Ғалымжанқызы. Олардың туындылары ұлттық болмысты дәстүрлі өрнектер мен заманауи көркем тіл арқылы бейнелейді.
Көрменің ең жас қатысушысы – график-суретші Тұмар Ғалымжанқызының жұмыстары ерекше назар аударады. Оның линогравюра және түпнұсқа графика техникасында орындалған еңбектері Қазақстанның ірі мегаполистерінің жинақталған бейнесін көрсетеді. Бұл туындыларда символизм мен сәулет ескерткіштерінің қатаң геометриясы үйлесім тапқан. Әртүрлі ұрпақ пен технологияның бірлігі композициялық тұрғыда көрініс табады. Сондай-ақ Қазақстанның Қызыл кітабына енген жануарлар – қар барысы мен дала киіктері бейнеленген жұмыстар да қызығушылық тудырады.
Суретшінің негізгі көркемдік құралы – сызық. Ырғақты штрихтар жануарлардың силуэтін ғана емес, оларды қоршаған кеңістікті – аспан, бұлт, өсімдік және жерді де қалыптастырады. Соның нәтижесінде монохромды шешімге қарамастан, тереңдік пен көпқабаттылық әсері пайда болады.
«Біздің барлығымызға бір ортақ дүние – аспан», – дейді Тұмар. Бұл идея оның жұмыстарында сәндік әрі символикалық түрде көрініс табады. Созылыңқы формалар, денедегі өрнектік элементтер мен пластиканың әдейі ұлғайтылуы линогравюра мен кітап графикасы дәстүрлерімен үндеседі.
Көрме 2026 жылғы 30 сәуірге дейін Қазақстан Республикасы Ұлттық орталық музейінің көрме залында жалғасады.
Мекенжайы: Алматы қаласы, Самал-1 ықшамауданы, 44.
Өз тілшіміз
