Құқықтық мәдениет – қоғам дамуының маңызды көрсеткіші

Қоғамның тұрақты дамуы мен мемлекеттік институттардың тиімді қызмет етуі ең алдымен заң үстемдігіне және азаматтардың құқықтық мәдениетіне байланысты. Осы тұрғыдан алғанда, Конституция – мемлекеттің құқықтық жүйесінің іргетасы ғана емес, қоғамдық қатынастарды реттейтін және азаматтар мен мемлекет арасындағы өзара жауапкершілікті айқындайтын басты құжат.

Конституцияда адамның құқықтары мен бостандықтары, азаматтық жауапкершілік, заң алдындағы теңдік және мемлекеттік басқарудың негізгі қағидаттары көрініс табады. Алайда бұл нормалардың іс жүзінде орындалуы үшін әрбір азамат өзінің құқықтары мен міндеттерін білуі маңызды.

Құқықтық мәдениет дегеніміз – заң талаптарын білу ғана емес, оны күнделікті өмірде сақтау, өзгенің құқығына құрметпен қарау және қоғамдық тәртіпке жауапкершілікпен қарау. Мұндай құндылықтар отбасында, білім беру ұйымдарында, еңбек ұжымдарында және жалпы қоғамдық ортада қалыптасады.

Әсіресе, жас ұрпақтың құқықтық сауаттылығын арттырудың маңызы зор. Өз құқығын білетін, заңды құрметтейтін және азаматтық ұстанымы қалыптасқан жастар елдің болашағына бейжай қарамайды. Сондықтан құқықтық түсіндіру жұмыстарын жүйелі жүргізу, ашық диалог қалыптастыру және азаматтардың қоғамдық өмірге белсенді қатысуына жағдай жасау қажет.

Конституцияның қағидаттары қоғам мүшелерінің ортақ құндылығына айналған кезде ғана құқықтық мемлекет идеясы нақты мазмұнға ие болады. Заңға құрмет – тек мемлекеттік органдардың міндеті емес, ол әрбір азаматтың күнделікті ұстанымы болуы тиіс.

Қорытындылай келе, құқықтық мәдениеті жоғары қоғам – тұрақтылықтың, сенімнің және әділетті дамудың кепілі. Ал Конституция осы құндылықтардың барлығын біріктіретін негізгі құқықтық бағдар болып қала береді.

Іле ауданының ішкі саясат бөлімі басшысы
Әлішер Әлімұлы