Алматы облысында міндетті әлеуметтік медициналық сақтандыруды енгізу шаралары жұмысын бастады
![](https://ile-tany.kz/wp-content/uploads/2020/01/FMSP-Foto-3-chel..jpg)
«2020 жылдың 1 қаңтарынан бастап медициналық сақтандырудың екі пакеті енгізілетін болады. Бұл жаңа модельдегі тегін медициналық көмек көрсету (ТМКК) және міндетті әлеуметтік медициналық сақтандыру (МӘМС) пакеттері»,- деп « Jetisy Media» алаңында Алматы облыстық денсаулық сақтау басқармасының басшысы Бауыржан Ысқақ тарқатып айтты.
Басқарма басшысы Бауыржан Ербозымұлының айтуынша, қазіргі таңда МӘМС жүйесін енгізу үшін келесі нормативті құқықты актілерге қажетті өзгерістер енгізілген: жоспарлау, тарифтік саясат, медициналық қызмет көрсетуді сатып алу мен төлеу.
2017 жылдан бастап жиналған жарналарды ескере отырып 2020 жылға бюджет жоспарланған. Нәтижесінде, облыс кескінінде ТМКК және МӘМС бойынша қаржыландыру көлемі 2020 жылы 105 млрд.теңгені құрап, соның ішінде 73 млрд.теңге үлесіне тиіп отыр. Ал, МӘМС жүйесі бойынша 32 млрд. теңгеге қаржыландырылады. Қаржыландыру өсімі 2019 жылмен салыстырғанда 37% құрайды.
Келер жылдың 1-ші қаңтарына орай міндетті әлеуметтік медициналық сақтандыру жүйесінің негіздері мен міндеттері бойынша кең ауқымды ақпараттық-түсініктеме жұмысы атқарылуда.
Ақпараттандыру жұмысы аймақтық «Жол картасы» негізінде жүзеге асырылуда.
МӘМС жүйесі бойынша ағымдағы жылы 4 210 кездесу өткізіліп, бір миллионнан астам адамды қамтып үлгерген. Апта сайын облыстық, аудандық газеттерде МӘМС тақырыбына мақалалар шығарылады, ағымдағы жылдың басынан бастап 618 мақала жарияланды.
Блогерлерді тарта отырып, 7 баспасөз-іс-шара, 7 блог-тур 175 PR-іс-шара өткізілген. Медициналық объектілерде 84 билборд, 426 баннер, инфостендтер орналастырылған.
Облыс бойынша міндетті әлеуметтік медициналық сақтандыруды енгізуге дайындық шеңберінде нақты жұмыстар жүргізілді.
«Жергілікті бюджет қаржысынан 112,0 млн.теңге сомаға 952 компьютер сатып алынды, медициналық мекемелер де өз қаржысы есебінен компьютерлер сатып алды, бұл жұмыс орындарын компьютерлік техникамен жабдықтауды 100%-ке дейін жеткізуге мүмкіндік берді»,- деп сөзін қысқа қайырды Бауыржан Ысқақ