Бiз жайлы

ГАЗЕТ ТАРИХЫ — АУДАН ТАРИХЫ

                «Іле таңы» қоғамдық-саяси газетінің жарық  көргеніне биыл 50 жыл толып отыр. Алматы облысының тоқсан жылдан астам тарихы бар аға басылымдармен салыстырғанда , әрине біздің газеттің жасы жарты ғасырға енді толы. Дегенмен, бұл басылым Іле ауданының қалың оқырмандарына кеңінен танылып, осы өңірдің  айнасына айналды десек қателеспейміз. Бүгінгі қалың ақпарат ағыны мен оны бұқара халыққа жеткізер қайнар көз-теледидар, радио, газет-журнал санының күн санап көбейіп келе  жатқан заманында «Іле таңының « да нарықта өз орнын таба алғаны анық. Ендеше, осы басылымның өткеніне көз жүгіртіп көрейік. 1969 жылдың мамыр айында Алматы облыстық партия комитетінің нұсқауымен Іле аудандық газетін ашу жөніндегі дайындық жұмыстары басталды. Облыстық партия комитетінің үгіт және насихат бөлімінің меңгерушісі Байболсын Етекбайұлы Жұматаевтың және алғашқы редактор Тұрысбековтың басшылығымен 1970 жылдың 1 қаңтарында Іле аудандық «Ильич жолы» — «Путь Ильича» деген атпен екі тілде 7 мың таралыммен шыға бастады. Газет Талғар және Қаскелең аудандарының полиграфиялық базасында құрылған Николаевка ауылындағы баспаханада шығарылды.

Аудандық газеттің журналистері аудан басшылығы жүргізген барлық шараларға белсене қатысып отырды.

Алғашқы редакторлар марқұм Тұрысбековтың,  Жасұлан Нұрғалиевтің және Байболсын Етекбайұлы Жұматаевтың басшылығымен аудандық газетте өзіндік стиль жасалынып, қаламы ұшқыр шығармашылық ұжым құрылды. Әсіресе бұл жұмыс газетті 16 жыл басқарған Байбосын Етекбайұлы Жұматаевтың тұсында жандана түсіп, белгілі бір дәрежеде «Жұматаев мектебі» қалыптасты. Байболсын Жұматаев зейнет жасына шыққан соң  1988-1991 жылдары газетті,  Әлім Анапиянов, 1991-1994 жылдары  танымал журналист Шархан Қазығұл, 1994-1996 жылдары Жанна Сыздықова басқарды. 1997 жылдың 3 наурызындаы осы басылымда 1978 жылдан  бері қызмет атқарып келе жатқан журналист Роза Маратқызы Айдарбекова газеттің бас редакторы болып тағайындалып, осы лауазымды қызметті 2020 жылдың 1 ақпанына дейін абыроймен атқарды.

Қайта құру газеттің өміріне біраз қиындықтар тигізбей қоймады. Газет Қапшағайға одан қайтып Энергетик поселкесіне көшірілді. Өзінің полиграфиялық базасынан айырылды. Нарық  қыспағынан екі рет, яғни 1994 жылы 4 ай, 1996 жылы 11 ай шықпай қалды.   1997 жылы аудан башыларының, аудандық мәслихаттың, селолық поселкелік округтер әкімдерінің, аудандық комитеттер басшыларының күшімен газетке жазылу науқаны қолға алынып, содан түскен қаржыға  компьютерлік жүйе немесе шағын баспахана сатып алынып, 1997 жылдың 1 мамырында қайтадан шығарыла бастады. Редакция ұжымы жаңа экономикалық жағдайға төтеп бере алды. Сөйтіп, облыста бірінші болып газет компьютерлік жүйеге көшті.
Редакция ұжымы аудан өміріне белсене араласуда. Шаруалардың фермерлердің, жеке кәсіпкерлердің тыныс-тіршіліктері кеңінен жариялануда. Осылайша аудан журналистері Қазақстан Республикасы Президентінің, облыс, аудан әкімдерінің саяси экономикалық, мәдени бағыт-бағдарларын жүзеге асыруға белсене араласуда.

«Іле таңы» аудандық газетте әр жылдары белгілі сыншы Бақыт Сарбалаев, жазушылар Шархан Қазығұл, Келес Рақымжанов, ҚР Президенті аппаратының жауапты қызметкері Жігер Байтелесов, филология ғылымдарының докторы Әйткен Есдәулетов, республикаға танымал журналистер Асқанбай Ерғожаев, Ерғазы Әсембеков, Дабыр Үшірбеков, Нина Устиненко, Ирина Новак, Нұрманбет Қизатов, Жомарт Молдахметов, Максим Сәрсенов,Ардақ Айбар, марқұм Ерғазы Әсембеков,  Ілияс Жүніс, Адай Әбділданов, Әлия Құрманбаева қызмет атқарып, жергілікті басылымның жұмысын жандандыруға өз үлестерін қосты.

Біздің шағын әрі ынтымағы жарасқан ұжымымыз алдағы уақытта да жемісті еңбек етіп, шығармашылық шабыттарын шыңдай түседі деп нық сеніммен айта аламын. 50 жылдық тарихы бар газеттің дәстүрі бұдан былай да өз жалғасын табады.

БАҚТИЯР РЫМЖАНОВ,
«Іле таңы « газетінің бас редакторы