Іле ауданында «Шұбат PARTY» акциясы өтті

15 наурыз күні өткен республикалық референдум аясында Іле ауданына қарасты Күрті ауылдық округіндегі №417 референдум учаскесінде «Шұбат PARTY» атты ерекше акция ұйымдастырылды. Іс-шараның басты мақсаты – учаскеге келген тұрғындарға көтеріңкі көңіл күй сыйлап, ұлттық дәстүрлерді насихаттау және маңызды саяси науқанға қатысуға келген азаматтарға құрмет көрсету болды.

Акция барысында дауыс беру үшін келген тұрғындарға қазақ халқының ежелден келе жатқан дәстүрлі сусыны – шұбат ұсынылды. Табиғи әрі пайдалы бұл ұлттық сусын тұрғындарға тегін таратылып, учаскеде ерекше мерекелік атмосфера қалыптасты. Ұйымдастырушылардың айтуынша, мұндай бастама тұрғындардың көңілін көтеріп қана қоймай, ұлттық құндылықтарды дәріптеуге де бағытталған.

Учаскеге келген азаматтар дауыс беру рәсімінен кейін бір-бірімен әңгімелесіп, шұбаттан дәм татып, ұйымдастырушыларға алғыстарын білдірді. Көптеген тұрғындар мұндай жылы қарсы алудың референдум күніне ерекше мән беріп, халықтың көңіл күйін көтергенін атап өтті.

Ақши ауылының тұрғыны Балқаш және Іле ауданының Құрметті азаматы, жазушылар одағының мүшесі, Шынәділ Мұқанов:

«Референдум күні мұндай мерекелік атмосфера болады деп күтпедік. Ұлттық сусын ұсынып, жылы қарсы алғандары өте жақсы әсер қалдырды. Осындай бастамалар адамдардың көңілін көтеріп, бір-бірімен еркін араласуына мүмкіндік береді», – деді.

Ұйымдастырушылардың айтуынша, бұл акция республикалық референдум күнінің маңызын айшықтап, азаматтардың ел болашағына қатысты маңызды шешімдерге бейжай қарамай, белсенді қатысуына ықпал етуді көздейді. Сонымен қатар, мұндай шаралар ұлттық дәстүрлерді дәріптеп, қоғамдағы бірлік пен ынтымақты нығайтуға да өз үлесін қосады.

Жалпы, Күрті ауылдық округіндегі №417 референдум учаскесінде өткен «Шұбат PARTY» акциясы тұрғындарға жақсы көңіл күй сыйлап, референдум күнінің есте қаларлық жарқын сәттерінің біріне айналды. Ұлттық сусын ұсынылған бұл бастама тұрғындар арасында жылы қабылданып, мерекелік әрі достық атмосфераның қалыптасуына ықпал етті.