«ТАЗА ҚАЗАҚСТАН» – ОРТАҚ ІСКЕ ЖҰМЫЛҒАН ЖҰРТ
Республикалық «Таза Қазақстан» экологиялық акциясы аясында Іле ауданының Байсерке ауылында ауқымды сенбілік ұйымдастырылып, тұрғындардың қоршаған ортаға деген жауапкершілігін арттыруға бағытталған маңызды іс-шара өтті. Табиғатты аялау, туған жердің тазалығын сақтау және экологиялық мәдениетті қалыптастыруды мақсат еткен сенбілікке мыңнан астам ауыл тұрғыны белсенді қатысып, ортақ іске өз үлестерін қосты.
Экологиялық акцияға мемлекеттік мекемелердің қызметкерлері, мәдениет және спорт саласының өкілдері, жастар, еріктілер, кәсіпкерлер, ауыл тұрғындары және Балалар мен жасөспірімдер спорт мектебінің ұжымы бір кісідей атсалысты. Әсіресе, жас ұрпақтың табиғатты қорғау бағытындағы бастамаларға белсенді араласуы олардың қоршаған ортаға деген жанашырлық көзқарасын қалыптастыруда маңызды рөл атқарды.
Сенбілік барысында негізгі жұмыстар Алматинка өзенінің жағалауында жүргізілді. Қатысушылар өзен маңын тұрмыстық қалдықтардан тазартып, ағаш бұтақтары мен қураған шөптерді жинап, аумақты ретке келтірді. Жұмыстың сапалы әрі уақытылы орындалуы үшін арнайы техника жұмылдырылып, жиналған қоқыстар арнайы полигондарға тасымалданды. Нәтижесінде 45 тоннадан астам тұрмыстық қалдық шығарылып, өзен жағалауының экологиялық жағдайы айтарлықтай жақсарды.
Сенбілік барысында Іле ауданы әкімінің орынбасары Асқар Сыдықов экологиялық акцияның маңыздылығына тоқталып, «Таза Қазақстан» бастамасы тек көшелер мен қоғамдық орындарды тазалаумен ғана шектелмейтінін атап өтті. Оның айтуынша, бұл жоба әрбір азаматтың туған жеріне деген сүйіспеншілігін арттырып, табиғатты қорғау мәдениетін қалыптастыруға және қоғамда экологиялық жауапкершілікті нығайтуға бағытталған. Осындай игі бастамалар тұрғындардың белсенділігі мен азаматтық ұстанымын көрсетіп, елді мекендердің көркеюіне оң ықпал етеді.
Балалар мен жасөспірімдер спорт мектебінің ұжымы бұл шараға ерекше белсенділік танытып, ұжымдық ұйымшылдық пен жауапкершіліктің жарқын үлгісін көрсетті. Олар өздерінің спорттағы жетістіктерімен ғана емес, қоғамдық жұмыстарға белсенді қатысып, туған өлкеге деген жанашырлықтарын нақты істерімен дәлелдей білді. Ұжым мүшелері үшін мұндай сенбіліктер – экологиялық тазалықты сақтаумен қатар, жастарға үлгі болатын тәрбиелік мәні зор шара.
Бүгінде «Таза Қазақстан» акциясы еліміздің барлық өңірінде кең қолдау тауып, табиғатты қорғау мәдениетін қалыптастыруға бағытталған жалпыұлттық қозғалысқа айналып келеді. Мұндай игі бастамалар тұрғындарды ортақ мақсатқа жұмылдырып, туған жердің тазалығы мен көркеюіне әр азаматтың үлес қоса алатынын көрсетеді. Табиғатты қорғау – бір күндік науқан емес, әрбір адамның күнделікті өмір салтына айналуы тиіс маңызды міндет.
Байсерке ауылында өткен ауқымды сенбілік те осының айқын дәлелі болды. Бірлік пен ұйымшылдықтың арқасында қысқа уақыт ішінде үлкен көлемдегі жұмыстар атқарылып, ауылдың санитарлық жағдайы жақсарды. Ең бастысы – тұрғындардың табиғатты қорғауға деген жауапкершілігі артып, туған жерге деген қамқорлықтың нақты көрінісі байқалды.
Осындай игі істер алдағы уақытта да жалғасын тауып, Байсерке ауылының ғана емес, бүкіл Іле ауданының экологиялық ахуалын жақсартуға, тұрғындарға қолайлы әрі таза өмір сүру ортасын қалыптастыруға өз септігін тигізері сөзсіз. Өйткені туған жердің тазалығы – әрбір азаматтың ортақ жауапкершілігі, ал «Таза Қазақстан» – сол жауапкершілікті нақты іске айналдыратын маңызды бастама.
Карима ДАУТҚАН
