Конституция – отбасы құндылықтары мен ұрпақ тәрбиесінің құқықтық негізі

Отбасы – қоғамның негізгі тірегі, ал ұрпақ тәрбиесі – мемлекеттің болашағын айқындайтын маңызды құндылықтардың бірі. Бұл бағыт Қазақстан Республикасы Конституциясында да ерекше көрініс тапқан.

Атап айтқанда, Конституцияның 27-бабында неке мен отбасы, ана, әке және бала мемлекеттің қорғауында болатыны, сондай-ақ ата-ананың балаларға қамқорлық жасау және оларды тәрбиелеу міндеті бекітілген.

Аталған норма отбасының қоғамдағы орнын айқындап қана қоймай, ата-ананың ұрпақ алдындағы жауапкершілігін де нақтылайды. Баланың тәрбиелі, білімді, отансүйгіш азамат болып қалыптасуы ең алдымен отбасындағы тәрбие мен өнегеге байланысты.

Сонымен қатар, отбасы құндылықтарын сақтау – тек жеке шаңырақтың міндеті емес, тұтас қоғам үшін маңызды мәселе. Өйткені өзара сыйластық, үлкенге құрмет, кішіге ізет және жауапкершілік сияқты қасиеттердің бастауы отбасынан қалыптасады.

Сондықтан Конституцияда бекітілген отбасы институтын қорғау қағидаты ұлттық құндылықтарды дәріптеуге, ұрпақ сабақтастығын сақтауға және тұрақты қоғам қалыптастыруға негіз болады.

Іле аудандық ақсақалдар кеңесінің төрағасы
Мақсат Сейдалиев