БУЛЛИНГТІҢ АЛДЫН АЛУ – ОРТАҚ МІНДЕТ

Балалардың құқықтары мен заңды мүдделерін қорғау, қауіпсіздігін қамтамасыз ету және психологиялық саулығын сақтау — қоғам алдындағы маңызды міндеттердің бірі. Осы ретте буллингтің алдын алу, оның себептері мен салдарын түсіндіру, сондай-ақ балаларға дер кезінде психологиялық қолдау көрсету мәселесі ерекше маңызға ие.

Буллинг — баланы жүйелі түрде қорлау, кемсіту, қорқыту, мазақ ету, әдейі оқшаулау немесе әлеуметтік желілер арқылы қудалау әрекеттері. Мұндай жағымсыз құбылыстар баланың психологиялық жағдайына кері әсер етіп, оның өзіне деген сенімін төмендетіп, білім алуына және әлеуметтік ортаға бейімделуіне кедергі келтіруі мүмкін.

Іле ауданында да балалардың қауіпсіздігін қамтамасыз ету және буллингтің алдын алу бағытындағы жұмыстардың маңызы зор. Бұл ретте ата-аналар мен педагогтер арасындағы өзара байланысты нығайтып, әрбір баланың жағдайына назар аудару, туындаған мәселелерді дер кезінде анықтап, тиісті шаралар қабылдау қажет.

Буллингке тап болған немесе осындай жағдайдың куәсі болған азаматтар мәселені жасырмай, тиісті мамандарға жүгінгені жөн. Атап айтқанда, Іле ауданындағы «Жанұя» отбасын қолдау орталығында азаматтарға тегін психологиялық көмек пен кеңес беріледі. Сонымен қатар, отбасы мен балалардың құқықтарын қорғау мәселелері бойынша тәулік бойы жұмыс істейтін 111 байланыс орталығына хабарласуға болады.

Баланың қауіпсіздігі мен амандығы — отбасының ғана емес, білім беру ұйымдары мен тұтас қоғамның ортақ жауапкершілігі. Сондықтан буллингтің кез келген көрінісіне жол бермей, балалар арасында өзара сыйластық пен құрмет мәдениетін қалыптастыру маңызды.

Буллингтің алдын алу — қауіпсіз қоғам қалыптастырудың маңызды қадамы. Әр бала қорқынышсыз өмір сүруге, білім алуға және құрметке лайық.