ІЛЕ АУДАНЫНДА ИНВЕСТИЦИЯЛЫҚ ЖОБА ЖҮЗЕГЕ АСТЫ: БАЙСЕРКЕДЕ ЖАҢА ДЕМАЛЫС ЖӘНЕ САУЫҚТЫРУ КЕШЕНІ АШЫЛДЫ
Іле ауданында кәсіпкерлік пен инвестиция тарту бағытындағы жұмыстар кезең-кезеңімен жүзеге асырылып келеді. Мемлекет пен бизнестің өзара тиімді әріптестігі нәтижесінде аудан экономикасы қарқынды дамып, жаңа өндіріс орындары мен қызмет көрсету нысандары ашылуда. Осындай маңызды жобалардың бірі – Байсерке ауылында пайдалануға берілген «Asau Royal Spa» заманауи демалыс және сауықтыру кешені.
Жаңа нысанның салтанатты ашылу рәсіміне Іле ауданы әкімінің орынбасары Мұхамедғаріп Құрманғалиев қатысып, кәсіпкерлікті қолдау мен инвестициялық жобаларды іске асырудың өңірдің әлеуметтік-экономикалық дамуына қосып отырған үлесін атап өтті. Оның айтуынша, мұндай бастамалар халықтың әл-ауқатын арттырумен қатар, ауданның туристік тартымдылығын күшейтуге де зор мүмкіндік береді.
Жобаның жалпы инвестициялық құны 850 миллион теңгені құрайды. Бұл – аудан экономикасына құйылған қомақты инвестиция ғана емес, сонымен қатар жаңа жұмыс орындарының ашылуына ықпал еткен маңызды жоба. Кешеннің іске қосылуы нәтижесінде 60 жаңа тұрақты жұмыс орны құрылып, жергілікті тұрғындарды тұрақты жұмыспен қамтуға мүмкіндік жасалды. Бұл өз кезегінде халықтың табысын арттырып, өңірдегі әлеуметтік тұрақтылықты нығайтуға оң әсер етеді.
«Asau Royal Spa» кешені қазіргі заман талаптарына толық сәйкес жабдықталған. Мұнда келушілердің жайлы демалысы мен денсаулығын нығайтуға арналған барлық жағдай қарастырылған. Заманауи инфрақұрылым, сапалы сервис және жоғары деңгейдегі қызмет көрсету кешеннің басты ерекшеліктерінің бірі саналады. Мұндай нысандардың көбеюі аудан тұрғындарының бос уақытын тиімді ұйымдастыруға ғана емес, өңірге келетін қонақтар санының артуына да ықпал етеді.
Соңғы жылдары Іле ауданында қызмет көрсету саласы қарқынды дамып келеді. Бұл бағыттағы инвестициялық жобалардың жүзеге асуы кәсіпкерлік белсенділікті арттырып, шағын және орта бизнестің өркендеуіне жол ашуда. Демалыс және сауықтыру кешендерінің ашылуы ішкі туризмді дамытуға, сервистік қызметтердің сапасын жақсартуға және өңір экономикасының жаңа бағыттарын қалыптастыруға мүмкіндік береді.
Экономикалық өсімнің басты көрсеткіштерінің бірі – инвестиция көлемінің артуы. Осы орайда Іле ауданында инвесторларға қолайлы жағдай жасау, инфрақұрылымды дамыту және жаңа жобаларды қолдау бағытындағы жұмыстар тұрақты түрде жүргізілуде. Нәтижесінде аудан аумағында жаңа кәсіпорындар, өндіріс орындары мен әлеуметтік маңызы бар нысандар іске қосылып келеді.
Байсерке ауылында ашылған «Asau Royal Spa» кешені де осындай нәтижелі жұмыстың жарқын көрінісі. Бұл жоба тұрғындарға сапалы қызмет ұсынып қана қоймай, ауданның инвестициялық әлеуетінің жоғары екенін тағы бір мәрте дәлелдейді. Сонымен қатар жаңа кешеннің іске қосылуы өңірдің туристік мүмкіндіктерін кеңейтіп, кәсіпкерліктің дамуына жаңа серпін береді.
Іле ауданында алдағы уақытта да осындай инвестициялық жобаларды жүзеге асыру жұмыстары жалғасын таппақ. Бұл өз кезегінде аудан экономикасының тұрақты дамуына, жаңа жұмыс орындарының ашылуына, халықтың әл-ауқатының жақсаруына және өңірдің әлеуметтік-экономикалық әлеуетінің артуына ықпал етеді.
Іле ауданы әкімдігі жаңа кәсіпорын ұжымына жемісті еңбек, тұрақты даму, толағай табыс және келушілерге әрдайым жоғары деңгейдегі қызмет көрсетуіне тілектестік білдіреді.
Карима ДАУТҚАН
