Құрылтай депутаттар сайлауына қалай дауыс береміз?
2026 жылғы 23 тамызда Қазақстанда Құрылтай депутаттарының сайлауы өтеді. Бұл – еліміздің қоғамдық-саяси өміріндегі маңызды науқан. Сондықтан әрбір азамат дауыс беру тәртібін алдын ала біліп, өзінің конституциялық құқығын тиімді пайдалана алғаны жөн.
Кімдер дауыс бере алады?
18 жасқа толған, сайлау құқығына ие Қазақстан Республикасының азаматтары өздерінің тіркелген сайлау учаскесінде дауыс береді. Сайлаушылар тізімі дауыс беру күніне дейін жасақталып, азаматтар оның ішінде өздерінің бар-жоғын алдын ала тексере алады.
Дауыс беру тәртібі қандай?
Дауыс беру күні сайлау учаскесіне жеке куәлікпен немесе заңда белгіленген жеке басын куәландыратын өзге де құжатпен келу қажет.
Учаскелік сайлау комиссиясы құжатты тексергеннен кейін сайлаушыға бюллетень береді. Арнайы кабинада ешкімнің ықпалынсыз өз таңдауыңызды белгілеп, бюллетеньді дауыс жәшігіне саласыз. Дауыс беру жасырын түрде өтеді және әр азамат тек бір рет дауыс береді.
Егер сайлау учаскесіне бара алмасаңыз…
Денсаулық жағдайына немесе заңда көрсетілген өзге себептерге байланысты сайлау учаскесіне келе алмайтын азаматтарға үйде немесе орналасқан жерінде дауыс беру мүмкіндігі қарастырылған. Ол үшін сайлау күні сағат 12:00-ге дейін учаскелік сайлау комиссиясына жазбаша өтініш беру қажет. Осыдан кейін комиссия мүшелері сайлаушының тұрған жеріне барып, дауыс беру рәсімін ұйымдастырады.
Неліктен дауыс беру маңызды?
Дауыс беру – әр азаматтың ел болашағына қатысты пікірін білдіретін маңызды азаматтық құқығы. Әрбір берілген дауыс Құрылтайдың заңды әрі әділ қалыптасуына ықпал етеді. Сондықтан ресми ақпаратқа сүйеніп, белгіленген күні сайлау учаскесіне барып, өз таңдауыңызды жасау – азаматтық жауапкершіліктің көрінісі.
Есте сақтаңыз: дауыс беру уақыты, сайлау учаскесінің мекенжайы және басқа да мәліметтерді Орталық сайлау комиссиясының ресми ақпараттарынан білуге болады.
