ХАЛЫҚ СЕНІМІ – ТИІМДІ МЕМЛЕКЕТТІК БАСҚАРУДЫҢ НЕГІЗІ

Мемлекеттің тұрақты дамуы мен қоғамның әл-ауқаты мемлекеттік басқару жүйесінің тиімділігіне, ашықтығына және жауапкершілігіне тікелей байланысты. Бұл ретте Конституция елдегі билік жүйесінің қызметін айқындап қана қоймай, мемлекет пен азамат арасындағы өзара байланыстың құқықтық негізін қалыптастырады.

Мемлекеттік басқарудың басты мақсаты – халықтың мүддесіне қызмет ету, азаматтардың құқықтары мен заңды мүдделерін қорғау және қоғамның өзекті мәселелерін уақытылы шешу. Сондықтан мемлекеттік органдардың жұмысы ашықтық, заңдылық және есептілік қағидаттарына негізделуі қажет.

Бүгінгі таңда азаматтардың мемлекеттік институттарға деген сенімін арттыру ерекше маңызға ие. Бұл үшін қабылданатын шешімдердің негізді болуы, халықпен тұрақты байланыс орнату және қоғамның ұсыныстары мен пікірлеріне назар аудару маңызды.

Менің пікірімше, тиімді мемлекеттік басқару тек қабылданған шешімдердің санымен емес, олардың халық өміріне тигізген нақты нәтижесімен бағалануы тиіс. Әрбір бастама азаматтардың тұрмыс сапасын жақсартуға және қоғамдық мүддені қамтамасыз етуге бағытталғанда ғана өз мақсатына жетеді.

Конституцияның негізгі құндылығы да осында – мемлекет қызметінің түпкі мақсаты адам мен оның құқықтары, бостандықтары және заңды мүдделері болуы керек.

Халыққа қызмет ету – мемлекеттік басқарудың басты өлшемі, ал халық сенімі – оның ең үлкен жауапкершілігі.

Сандуғаш Карменова
Іле ауданының мемлекеттік сатып алу бөлімінің басшысы