Конституция – ұлт құндылығы мен ұрпақтар сабақтастығының кепілі

Ата Заң – қоғамның құқықтық тірегі ғана емес, ұлттық болмысымызды сақтап, келешек ұрпақтың кемел қалыптасуына бағыт беретін маңызды құндылық.

Конституция туралы сөз қозғағанда, ең алдымен азаматтардың құқықтары мен бостандықтары, заң үстемдігі және мемлекеттің тұрақтылығы ойға оралады. Алайда Ата Заңның мәні мұнымен ғана шектелмейді. Оның қоғам өміріндегі маңызды қырларының бірі – ұлттық құндылықтарды дәріптеу, тарихи-мәдени мұраны сақтау және ұрпақтар сабақтастығын нығайту.

Қай мемлекеттің де болашағы оның экономикалық әлеуетімен ғана емес, рухани байлығымен, азаматтарының санасымен және ұлттық бірегейлігін сақтай білуімен өлшенеді. Осы тұрғыдан алғанда, Конституция ел дамуының құқықтық бағытын айқындап қана қоймай, қоғамдағы ортақ жауапкершілік пен құндылықтар жүйесінің қалыптасуына негіз болады.

Ұлттық құндылық – ұлттың рухани тірегі

Ұлттың болмысын айқындайтын басты белгілердің қатарында ана тілі, салт-дәстүр, мәдениет, тарих және отбасылық тәрбие бар. Бұлар – ұрпақтан ұрпаққа жалғасып келе жатқан рухани мұра. Оларды сақтау мен дамыту – тек жекелеген азаматтардың емес, тұтас қоғамның ортақ міндеті.

Конституцияда мемлекеттік тілдің мәртебесі, мәдениетті қолдау, білім алу және отбасы құндылықтарына қатысты құқықтық қағидаттардың көрініс табуы осы бағыттағы қоғамдық дамудың маңызын айқындайды.

Әсіресе, жаһандану дәуірінде ұлттық болмысты сақтау мәселесі өзекті. Ақпараттық кеңістік кеңейіп, түрлі мәдени ықпалдар күшейген кезеңде жас ұрпақтың ұлттық тамырынан ажырамауы маңызды. Бұл ретте құқықтық тәрбие мен ұлттық тәрбие өзара сабақтасып, бірін-бірі толықтыруы қажет.

Болашақ – саналы ұрпақтың қолында

Қоғамның құқықтық мәдениеті отбасынан басталады. Бала заңды құрметтеуді, өзгенің құқығын сыйлауды, жауапкершілікті сезінуді ең алдымен күнделікті өмірдегі қарым-қатынастан үйренеді. Ал білім беру ұйымдары осы тәрбиені жүйелі түрде жалғастырып, жас буынның азаматтық ұстанымын қалыптастыруға ықпал етеді.

Конституцияны құрметтеу – оның баптарын жаттап алумен шектелмейді. Ол – заң талаптарын сақтау, қоғамдық тәртіпке жауапкершілікпен қарау, өз құқығыңды білу және өзгенің құқығына құрметпен қарау.

Осы тұрғыдан алғанда, жас ұрпаққа Конституцияның маңызын түсіндіру, олардың құқықтық сауаттылығын арттыру және ел болашағына бейжай қарамайтын азаматтық көзқарасын қалыптастыру – бүгінгі қоғам алдындағы маңызды міндеттердің бірі.

Өткенге құрмет – болашаққа аманат

Ұрпақтар сабақтастығы дегеніміз – өткеннің өнегесін бүгінгі өмірмен ұштастырып, оны келешекке жеткізу. Бұл үдерісте ұлттық құндылықтар мен құқықтық мәдениеттің орны ерекше.

Әрбір азамат Ата Заңды құрметтеп, елдің қоғамдық өміріне белсенді араласқанда ғана құқықтық мәдениеті жоғары, рухани негізі берік қоғам қалыптасады.

Қорыта айтқанда, Конституция – мемлекет пен қоғам арасындағы сенімнің, жауапкершілік пен тұрақтылықтың негізі. Ал ұлттық құндылықтарды сақтау – сол қоғамның рухани тұтастығын қамтамасыз ететін маңызды бағыт.

Ата Заңға құрмет – елге құрмет. Ұлттық құндылыққа адалдық – келер ұрпақ алдындағы жауапкершілік.

Қарлығаш Тұранқызы