Референдум учаскесінде ерекше көрініс: суперқаһармандар дауыс берді

Референдум күні Іле ауданы, Кенен Әзірбаев ауылындағы №357 референдум учаскесінде ерекше әрі көңілді көрініс орын алды. Учаскеге суперқаһарман кейіпкерлерінің киімін киген азаматтар келіп, дауыс беріп, жиналған халықтың көңілін көтерді.

Олардың арасында көпшілікке таныс Өрмекші адам мен Супержігіт бейнесіндегі кейіпкерлер болды. Ерекше костюммен келген олар алдымен учаскеде тіркеліп, өздерінің азаматтық таңдауын жасап, референдумға қатысып дауыс берді.

Суперқаһармандардың учаскеге келуі тұрғындар үшін күтпеген әрі қызықты сәтке айналды. Әсіресе балалар мен жастар бұл көрініске қуанып, кейіпкерлермен суретке түсіп, көтеріңкі көңіл күйге бөленді.

Ұйымдастырушылардың айтуынша, мұндай ерекше акцияның мақсаты — халықтың референдумға деген қызығушылығын арттырып, азаматтарды белсенді қатысуға шақыру.

Осылайша, суперқаһармандардың келуі референдум учаскесіндегі атмосфераны жандандырып, тұрғындарға мерекелік көңіл күй сыйлады.