Әлеуметтік желі жастардың уақытын ұрлап жүр ме?

Бүгінде әлеуметтік желі жастар өмірінің ажырамас бөлігіне айналды. Таңертең оянғаннан кейін телефонды тексеру көп адам үшін әдетке айналған. Сабақ арасында, жолда немесе демалыс кезінде де жастар әлеуметтік желіге кіреді. Бірнеше минутқа кірген адам кейде ондаған минутын өткізіп алады. Бұл жағдай уақытты тиімді пайдалануға кедергі келтіреді.

Әлеуметтік желілер адамның назарын ұзақ уақыт ұстайды. Бір бейнені көргеннен кейін келесі бейне бірден ұсынылады. Қызықты контент қолданушыны әрі қарай көруге ынталандырады. Сондықтан адам өзінің қанша уақыт өткізгенін байқамай қалуы мүмкін. Бес минутқа ашылған телефон кейде жарты сағатқа созылады.

Бұл мәселе студенттерге де әсер етеді. Телефондағы хабарламалар сабақ кезінде назарды бөледі. Әлеуметтік желіге алаңдаған студент тапсырмасын баяу орындайды. Кей жағдайда оқу жұмысы бірнеше рет тоқтайды. Нәтижесінде студенттің бос уақыты да азаяды.

Дегенмен әлеуметтік желіні толықтай зиянды құрал деп айтуға болмайды. Жастар интернет арқылы жаңалық оқиды және білім алады. Олар пайдалы курстар тауып, жаңа дағдылар үйренеді. Кейбір жастар әлеуметтік желі арқылы шығармашылығын көрсетеді. Сондықтан мәселе әлеуметтік желінің өзінде емес, оны қалай қолданатынымызда.

Менің ойымша, жастар уақытын басқаруды үйренуі керек. Әлеуметтік желіге күн сайын белгілі бір уақыт бөлуге болады. Сабақ кезінде телефонды үнсіз режимге қойған дұрыс. Ұйықтар алдында әлеуметтік желіні қолдануды азайту да пайдалы. Бұл қарапайым әдеттер уақытты тиімді пайдалануға көмектеседі.

Әлеуметтік желі біздің уақытымызды өздігінен ұрламайды. Оған қанша уақыт бөлетінімізді өзіміз шешеміз. Уақытын дұрыс басқара алған адам әлеуметтік желіні пайдалы құралға айналдыра алады. Сондықтан жастар экранға емес, өз мақсатына көбірек көңіл бөлуі керек.

Жұмаш Нұрай

ҚазХҚжӘТУ, 1-курс студенті

Журналистика факультеті