Алматы облысының жаңалықтарыАудан жаңалықтары

ТӘУЕЛСІЗДІКТІҢ 35 ЖЫЛДЫҒЫ ЖӘНЕ ІЛЕ АУДАНЫНЫҢ ӨРКЕНДЕУІ

 

Егемендік жылдарындағы жетістіктер мен жарқын өзгерістер

Тәуелсіздік – халқымыздың ғасырлар бойы аңсаған асыл арманы, азаттықтың айшықты белгісі. Биыл Қазақстан Республикасы өзінің ең қастерлі құндылығы – Тәуелсіздігінің 35 жылдығын атап өтуде. Осы уақыт ішінде еліміз мемлекеттілігін нығайтып, саяси, экономикалық және әлеуметтік даму жолында көптеген белестерді бағындырды. Егемендік жылдары еліміздің әрбір өңірі жаңарып, қалалар мен ауылдар көркейіп, халықтың тұрмыс сапасын арттыруға бағытталған ауқымды жұмыстар жүзеге асырылды.

Бұл өзгерістерден Алматы облысының маңызды аймақтарының бірі – Іле ауданы да шет қалған жоқ. Тәуелсіздік жылдарында ауданның әлеуметтік-экономикалық әлеуеті артып, елді мекендердің келбеті жаңарып, халық саны өсті. Жаңа тұрғын үйлер, әлеуметтік нысандар мен өндіріс орындары бой көтеріп, ауданның даму қарқыны жаңа деңгейге көтерілді.

Бүгінде Іле ауданы – өнеркәсібі өркендеген, кәсіпкерлігі дамыған, әлеуметтік және мәдени әлеуеті артып келе жатқан өңірлердің бірі. Мұның барлығы – егемендік жылдарында қалыптасқан мүмкіндіктер мен туған жердің дамуына үлес қосқан азаматтардың еңбегінің нәтижесі.

Мәдениет – ұлт руханиятының тірегі

Тәуелсіздік жылдарындағы маңызды жетістіктердің бірі – ұлттық мәдениет пен руханияттың жаңғыруы. Іле ауданында мәдениет саласын дамытуға, өнер ұжымдарын қолдауға және мәдени нысандардың материалдық-техникалық базасын нығайтуға ерекше көңіл бөлініп келеді.

2025 жылы Өтеген батыр ауылында 400 орындық Нұрғиса Тілендиев атындағы аудандық мәдениет үйі пайдалануға берілді. Бұл – ауданның мәдени өміріндегі айтулы оқиғалардың бірі. Жаңа мәдениет ошағына қазақ музыка өнерінің көрнекті өкілі, композитор Нұрғиса Тілендиевтің есімі беріліп, ғимарат аумағында ескерткіші мен стеласы орнатылды.

Сонымен қатар Боралдай кентінде 280 орындық мәдениет үйінің құрылысы аяқталуға жақындады. Аталған нысан ауыл тұрғындарының шығармашылықпен айналысуына, ұлттық өнер мен дәстүрді дәріптеуіне жаңа мүмкіндік береді.

Ауданның мәдениет саласындағы жетістіктері облыстық және республикалық деңгейде де көрініс тауып келеді. 2025 жылы Іле ауданы «Ауылым – алтын бесігім» облыстық байқауында бас жүлдені иеленіп, жеңімпаз ретінде автокөлікке қол жеткізді. Бұл – аудан өнерпаздарының, мәдениет қызметкерлері мен шығармашылық ұжымдардың қажырлы еңбегінің жемісі.

Ұлттық құндылықтар – ұрпаққа аманат

Тәуелсіздік жылдарында ұлттық сананың жаңғыруы, тарихи тұлғаларымыздың есімдерін ұлықтау және тарихи атауларды қалпына келтіру жұмыстары жаңа серпін алды.

Іле ауданында да ономастика саласында жүйелі жұмыстар жүргізілді. Идеологиялық тұрғыдан ескірген атаулар өзгертіліп, ел тарихында өзіндік орны бар тұлғалардың есімдері елді мекендер мен көшелерге берілді.

Атап айтқанда, Энергетический ауылы – Өтеген батыр, Чапаев ауылы – Байкент, Междуреченское ауылы – Ақсай, Покровка ауылы – Кенен Әзірбаев, Казцик ауылы – Асқар Тоқпанов, Комсомол ауылы – Жайнақ болып қайта аталды.

Сонымен қатар соңғы жылдары ауданда 500-ге жуық көшенің атауы жаңартылды. №53 мектепке Бердібек Соқпақбаевтың, аудандық мәдениет үйіне Нұрғиса Тілендиевтің есімі берілді.

Мұның барлығы – туған жердің тарихын түгендеу, ұлттық болмысты сақтау және жас ұрпақтың бойына отаншылдық сезім қалыптастыру жолындағы маңызды қадамдар.

Спорт – салауатты ұрпақ кепілі

Тәуелсіздік жылдарында аудан спорты да айтарлықтай дамыды. Бүгінде Іле ауданының жас спортшылары облыстық, республикалық және халықаралық жарыстарда өнер көрсетіп, жүлделі орындарға ие болып келеді.

Әсіресе, әлем чемпионаттары мен Азия деңгейіндегі жарыстарда топ жарған спортшылардың жетістіктері – аудан жастары үшін үлкен мақтаныш әрі үлгі.

Спорт саласындағы басты міндеттердің бірі – бұқаралық спортты дамыту, балалар мен жасөспірімдерді спортқа кеңінен тарту және спорттық инфрақұрылымды жетілдіру. Осы бағыттағы жұмыстар алдағы уақытта да жалғасын табады.

Өркендеу – ортақ еңбектің нәтижесі

Іле ауданының бүгінгі даму қарқыны ең алдымен оның экономикалық әлеуетімен тығыз байланысты. Аудан аумағында өнеркәсіп орындары жұмыс істеп, шағын және орта бизнес субъектілерінің саны артып келеді. Жаңа өндіріс орындарының ашылуы жұмыс орындарын құруға, инвестиция тартуға және жергілікті экономиканың дамуына серпін беруде.

Сонымен қатар тұрғындардың өмір сүру сапасын арттыру, елді мекендердің инфрақұрылымын жақсарту, жолдарды жөндеу, инженерлік желілерді жаңғырту және әлеуметтік нысандар салу бағытындағы жұмыстар кезең-кезеңімен жүзеге асырылуда.

Ауданның әрбір жетістігінің артында туған жерінің дамуына үлес қосып жүрген еңбек адамдарының, ұстаздардың, дәрігерлердің, мәдениет пен спорт саласы қызметкерлерінің, кәсіпкерлер мен қарапайым тұрғындардың еңбегі тұр. Сондықтан ауданның өркендеуін бір ғана саланың жетістігімен өлшеуге болмайды. Бұл – баршаға ортақ еңбектің нәтижесі.

Болашаққа бағдар – жарқын келешек

Тәуелсіздіктің 35 жылдығы – өткен жолды саралап, қол жеткізген жетістіктерді бағамдайтын ғана емес, болашаққа жаңа мақсаттар белгілейтін маңызды кезең.

Алдағы уақытта да Іле ауданының әлеуметтік-экономикалық дамуын қамтамасыз ету, елді мекендердің инфрақұрылымын жаңғырту, жолдар мен инженерлік желілерді жақсарту, жаңа әлеуметтік нысандар салу және тұрғындарға қолайлы орта қалыптастыру бағытындағы жұмыстар жалғасын табады.

Бұл ретте мемлекет тарапынан көрсетілетін қолдау, кәсіпкерлердің бастамалары мен тұрғындардың белсенділігі маңызды рөл атқарады. Біздің басты мақсатымыз – Тәуелсіздік жылдарында қол жеткізген жетістіктерді еселей отырып, Іле ауданын өмір сүруге қолайлы, экономикасы дамыған, мәдениеті мен руханияты өркендеген өңірге айналдыру.

Өйткені туған жердің дамуы – баршамызға ортақ жауапкершілік. Ал егемендіктің қадірін білу – оны көздің қарашығындай сақтап, келер ұрпаққа аманат ету.

Тәуелсіздік – баға жетпес байлығымыз, бірлік – басты тірегіміз, ал туған жердің өркендеуі – ортақ міндетіміз.

Басқа жаңалықтар

Back to top button